2:1 「你著寫批互佇以弗所的教會的使者，講：『正手 七粒星，行佇七支金燈台中的，伊的話講：
2:2 我知你的所行，及你的著磨、吞，許個做歹的人你亦容允伊。許個家己講是使徒其實呣是的，你曾試驗，知是白賊。
2:3 你亦有吞，曾為著我的名忍受，無厭倦。
2:4 若是我有所責備你的，就是你已經離開起頭的疼。
2:5 所以，著記得你對叨落跋落來，著反悔，來行你起頭的所行。若無按呢，你若呣反悔，我欲到你遐，徙你的燈台離開伊的位。
2:6 若是你猶有一項可取，就是我所怨恨尼哥拉黨的所行，你亦怨恨伊。
2:7 有耳孔的，著聽聖神給諸個教會所講的。得勝的人，我欲將上帝樂園中活命樹的果子互伊食。』」
2:8 「你著寫批互佇士每拿的教會的使者，講：『做起頭及路尾的，曾死來復活的，伊的話講：
2:9 我知你的患難及喪鄉（實在你是好額），許個家己講是猶太人，其實呣是的，就是做撒但的會，的謗瀆我亦知。
2:10 莫得驚你所欲受的艱苦。你看，魔鬼欲將恁中間幾若人落監，互恁抵著試，恁欲受患難十日。你著盡忠到死，我就欲用活命的冕旒賞賜你。
2:11 有耳孔的，著聽聖神給諸個教會所講的。得勝的人，決斷無受著第二擺死的害。』」
2:12 「你著寫批互佇別迦摩的教會的使者，講：『彼個有雙面利的劍的，伊的話講：
2:13 我知你所住的位，就是撒但座位的所在；你持守我的名，亦未曾呣認你的信我；佇安提帕的日，伊就是做我的干證盡忠佇我的，受佇恁中間，就是佇撒但所住的位。
2:14 若是我有幾若項欲責備你：因為佇你遐有人持守巴蘭的教；早巴蘭曾教示巴勒將塞礙的物佇以色列子孫的面前，互食祭偶像的物，續行姦淫。
2:15 親像按呢你亦猶原有人持守尼哥拉黨的教。
2:16 所以，著反悔；若無按呢，就我緊緊到你遐，欲用我的嘴的劍及交戰。
2:17 有耳孔的，著聽聖神給諸個教會所講的。得勝的人，我欲用所囥密的嗎哪互伊，閣用白的石互伊，石頂刻新的名；受的人以外，無人識伊。』」
2:18 「你著寫批互佇推雅推喇的教會的使者，講：『上帝的子目睭親像火焰、腳親像光亮的銅的，伊的話講：
2:19 我知你的所行、你的疼，及信，及服事，及吞，閣你路尾的所行，比起頭的卡多。
2:20 若是我有所責備你的，就是你容允彼個婦仁人耶洗別家己稱做先知的，伊教示閣迷惑我諸個奴僕行姦淫，及食祭偶像的物。
2:21 我互伊有時陣通反悔，若是伊無欲反悔離開伊的淫行。
2:22 我欲伊佇眠床。許個及伊行淫的，若無反悔離開伊的所做，我亦欲佇大患難。
2:23 我欲用死滅伊的子兒，就諸個教會攏欲知，我是鑑察人的心腸的，亦欲照恁逐人的所行來報應恁。
2:24 若是恁佇推雅推喇其餘的人，凡若無承受此號教示、亦呣識所講撒但深奧的事，我給恁講，我無用別號的擔互恁擔。
2:25 獨獨恁所有的，著持守伊，到我來。
2:26 得勝的人及守我的行做到路尾的，我欲互伊有權治理列邦；
2:27 伊欲用鐵枴管轄，那準磁的器具受拍碎，親像我對我的父承受權柄一樣。
2:28 我也欲用啟明星互伊。
2:29 有耳孔的，著聽聖神給諸個教會所講的。』」