22:1 好名聲卡贏過大發財；恩惠卡好金銀。
22:2 好額喪鄉相往來，攏是耶和華所創造。
22:3 通達的人看見災禍就閃匿；戇直的人進前去受災害。
22:4 謙卑敬畏耶和華的報賞，就是好額、尊貴、活命。
22:5 乖僻的人的路有莿帕及羅網；保守伊的靈魂的，就離開伊遠遠。
22:6 教養囝仔，著用合宜的法，就伊到老也無歪斜。
22:7 好額的管轄喪鄉人；欠債的做債主的差用。
22:8 栽種罪惡的，欲收災禍；伊受氣的枴欲廢除。
22:9 好心的人，欲得著福氣，因為將伊的米糧分互喪鄉人。
22:10 趕出侮慢的人，就無相爭；冤家及凌辱也欲息。
22:11 愛清氣心肝的人，因為伊講恩典的話，王欲做伊的朋友。
22:12 耶和華的目睭看顧聰明的人，總是伊敗壞講奸詐的人的言語。
22:13 貧憚的人講：有獅佇外面；我佇街路裡欲受害死。
22:14 淫婦的嘴是深坑；耶和華所厭惡的，欲跋落佇彼內面。
22:15 愚戇縛纏佇囝仔的心內，若是教督的枴仔趕伊離開遠遠。
22:16 欺負喪鄉人來利益家己，閣送禮物互好額人的，攏致到欠缺。
22:17 你著俯耳孔聽智慧的人的話，專心佇我的知識。
22:18 若存佇你的心，吊佇你的嘴唇，這就是好。
22:19 我今仔日刁持用這指示你，為著欲互你倚靠耶和華。
22:20 計劃及知識的好事，我豈無寫互你嗎？
22:21 互你知真理的話的確實，互你通用真的話回覆差你的。
22:22 呣通搶劫喪鄉人的物，因為伊喪鄉，也呣通佇城門口欺負困苦的人；
22:23 因為耶和華欲替伊伸冤；搶奪的，耶和華欲搶奪許個人的生命。
22:24 快受氣的人，呣通及伊交陪；大受氣的人，莫得及伊往來；
22:25 驚了你學伊的所行，家己陷落佇羅網。
22:26 你呣通做彼號給人答應的，抑是給欠錢的做保認。
22:27 你若無通還，驚了人會來夯你睏的眠床。
22:28 早時你的祖公所立的地界，你呣通遷徙。
22:29 你有看見人殷勤辦代誌的無？伊欲徛佇王的面前，無欲徛佇下賤的人的面前。