20:1 酒是致到侮慢的，厚酒致到喧嘩；見若因為伊來錯誤的，是無智慧。
20:2 王的威風親像獅噤噤哮；惹伊受氣的，是害家己的生命。
20:3 離開相爭彼號人有榮光；獨獨戇人愛冤家。
20:4 貧憚的人佇冬天的時無欲種作，到收割的時，伊求乞也得著。
20:5 人心內的計謀，是親像深的水，獨獨明理的人才會給伊揪出來。
20:6 講起家己的仁慈的真多，若是忠信的人真得著。
20:7 照正直來行的義人，伊的後裔有福氣！
20:8 王坐佇審判的位，用伊的目睭趕散攏總的歹。
20:9 是誰會講，我已經清氣我的心，我的罪已經洗除？
20:10 鉈子無同，升、斗無同，攏是耶和華所厭惡。
20:11 連囝仔佇所做的，也顯明伊的本性，伊所行的或是聖潔，抑正直。
20:12 會聽的耳孔，會看的目睭，二項攏是耶和華所做的。
20:13 莫得貪眠，免致到喪鄉；展開你的目睭，才有夠額的米糧。
20:14 買物的講：呣好，呣好；到買去了，家己誇口。
20:15 有金也有寶石多多，總是有知識的嘴唇就成做貴氣的珍寶。
20:16 為著生份人擔保，著提彼人的衫；替外人做保認，彼個人著擔當責成。
20:17 用瞞騙來得著食物，人掠做滋味；總是後來，伊的嘴滿滿是沙。
20:18 對參詳逐項的計劃得著成；你欲交戰著用好的計策。
20:19 四界行講人的長短，漏泄祕密的事；厚話的，呣通及伊結交。
20:20 咒詛老父抑老母的，伊的燈欲熄，佇極黑暗的中間。
20:21 起頭緊緊得著的產業，路尾呣是做伊的福氣。
20:22 你莫得講，我欲報應歹；著聽候耶和華，伊欲救你。
20:23 鉈子無相同是耶和華所厭惡；假的天秤也是呣好。
20:24 人的腳步是對耶和華定著；人豈會知伊的路嗎？
20:25 人隨便講，這是聖物，下願了才查問，這是做伊的羅網。
20:26 智慧的王撥散歹人，互車輪碖伊。
20:27 人的心神是耶和華的燈，鑑察人的心腹。
20:28 仁慈及真實保全國王，伊的座位也因為仁慈來堅固。
20:29 勇健是少年人的榮光；白頭毛就是老人的體面。
20:30 用鞭拍傷除去人的罪惡；拍會入人的心腹。