17:1 耶穌閣對伊的學生講：「塞礙人的事免得有；總是看對是誰來，彼人有災禍！
17:2 設使互諸個微細的一個受塞礙，卡好互人用大石磨吊伊的頷頸，給伊落海。
17:3 恁著家己謹慎！若恁的兄弟犯罪，著責備伊；伊若反悔，著赦免伊。
17:4 若是伊一日得罪你七擺，也七擺越轉給你，講：『我反悔啦』，你就著赦免伊。」
17:5 使徒給主講：「加添阮的信。」
17:6 主講：「恁若有信親像一粒的芥菜子，就命令此欉桑材樹講：『拔你的根，去栽佇海裡』，伊也欲順趁你。
17:7 恁中間甚麼人有奴僕作園抑是顧羊，對園裡倒來，豈欲給伊講：『即時坐來食』嗎？
17:8 豈無欲給伊講：『備辦互我食，縖帶來服事我，聽候我飲食息，你才通飲食』嗎？
17:9 奴僕行所命令的，豈有給伊說謝嗎？
17:10 按呢，恁已經一盡行所命令恁的，就著講：『阮是無利益的奴僕，行所應該行的若定。』」
17:11 耶穌去耶路撒冷的時，對撒瑪利亞及加利利交界經過。
17:12 入一個鄉社的時，有十個癩的，抵著伊，遠遠徛，
17:13 出聲講：「耶穌，先生，憐憫阮！」
17:14 耶穌看見，給講：「恁去將本身互祭司驗。」去的時就得著清氣。
17:15 其中一人看見家己已經好，就倒轉來大聲謳咾上帝，
17:16 仆落佇耶穌的腳前來感謝伊；此人是撒瑪利亞人。
17:17 耶穌應講：「十人豈無攏得著清氣嗎？彼九個佇叨落？
17:18 此個別族的人以外，猶無別人倒轉來歸榮光上帝嗎？」
17:19 就給彼人講：「起來，做你去！你的信有救你。」
17:20 法利賽人問：「上帝的國底時會臨到？」耶穌應講：「上帝的國臨到呣是顯然。
17:21 也講得：『佇遮！抑是佇遐！』因為上帝的國是佇恁內中。」
17:22 閣對學生講：「時日欲到，恁真愛看見人子的一日，也無通看見。
17:23 欲有人給恁講：你看，佇遐！你看，佇遮！恁莫得去，莫得隨！
17:24 因為親像閃爁對天此邊閃，光照到天彼邊，人子佇伊的日也欲按呢。
17:25 總是伊的確著代先受多多艱苦，也互此世代棄拺。
17:26 親像佇挪亞的日怎樣，佇人子的日也欲按呢。
17:27 飲食嫁娶，到挪亞入大船的日，大水到滅眾人。
17:28 閣親像佇羅得的日；飲食，買賣，種作，起厝。
17:29 若是羅得出所多瑪的日，對天落火及硫磺，滅眾人。
17:30 佇人子顯現的日也欲按呢。
17:31 當彼日，佇厝頂的，伊的物佇厝內，莫得落來提伊；佇園裡的，也莫得倒轉來。
17:32 著記得羅得的某。
17:33 見若致意顧伊的生命的，欲失落伊；見若失落伊的，欲保全伊。
17:34 我給恁講，彼暝二人像床，一個取去，一個放去。
17:35 二個婦仁人同挨磨，一個取去，一個放去。」
17:36 ｛有二人佇園裡，一個取去，一個放 。〔台語羅馬譯本無此節！〕｝
17:37 應伊講：「主啊，佇甚麼所在啊？」伊給講：「身屍若佇遐，鷹鳥也欲聚集佇遐。」