38:1 彼時，耶和華對大風的中間應約伯講：
38:2 今一個用無知的話，互所議論的無明，是是誰啊？
38:3 你著縖腰親像大丈夫；我問你，你應我。
38:4 我下地的地基，彼時你佇叨落？你若知影，就講伊。
38:5 是誰定著伊的寸尺？是誰牽繩索佇伊的頂面，你知嗎？
38:6 伊的地基祀佇甚麼的頂面？抑是伊角頭的石，是誰安置啊？
38:7 當彼時，天光早的星相及唱歌；上帝的眾子也攏出歡喜的聲。
38:8 大海衝出，親像對胎裡出來，彼時是誰用門關伊？
38:9 彼時我用雲做伊的衫，用黑暗做布包伊，
38:10 給伊定著我所立的界限，閣給伊設門楗及門，
38:11 講：你通到遮，呣通過，你驕傲的湧到遮為止。
38:12 對你出世的日以來，你曾命令早起時，互天光早知伊的所在，
38:13 互伊地的四極，將歹人搬出去？
38:14 伊就變換親像過印的土，出現親像衣服。
38:15 歹人所算做的光，今對收倒轉；抬高的手欲遏折。
38:16 你曾入海的水源嗎？抑是曾行佇深淵秘密的所在嗎？
38:17 死無的門有給你開嗎？死蔭的門你曾看見嗎？
38:18 地的闊大，你有看透無？你若一盡知，做你講！
38:19 光明徛起的所在彼條路對叨落去？閣黑暗的所在佇叨落？
38:20 通互你導伊倒去伊的境界？你會知影透到伊的厝的路嗎？
38:21 你知啦！因為彼時你已經出世，你年歲的數額也多。
38:22 你曾入雪的庫房，抑是看見雹的府庫？
38:23 就是我所收囥來聽候患難的期，聽候相交戰的日嗎？
38:24 光對甚麼路分開？東風對甚麼路四界吹佇地上？
38:25 是誰給大雨水開路？抑是備辦雷電的路？
38:26 來落雨佇無人的地，佇無人徛起的曠野？
38:27 互拋荒荒廢的地得著夠額，互青草發生？
38:28 雨水有老父嗎？露水一點一點是誰生的啊？
38:29 冰對甚麼的胎出？天的霜是是誰生的啊？
38:30 諸個水堅親像石頭；深淵的面結歸塊。
38:31 昴星歸簇是你縛的嗎？參星的帶是你解的嗎？
38:32 你互十二宮照伊的時候出來？也導北斗及伊所屬的星嗎？
38:33 你知天的定例嗎？抑是設伊的權管轄地嗎？
38:34 你會出聲叫雲，互雨水多多遮蓋你嗎？
38:35 你會發出閃爁，就去，對你講；阮佇遮？
38:36 是誰用智慧下佇內面？是誰賞賜聰明佇心內？
38:37 是誰會用智慧算雲的數額？是誰會傾天的盆？
38:38 彼時，塵埃成做土糜，土就結歸團？
38:39 你有給母的獅、著食物，互獅仔肫食飽嗎？
38:40 就是伊佇穴內撐腳，佇隱密的所在匿的時。
38:41 烏鴉子向上帝哀求，無通食飛來飛去的時；是誰為烏鴉備辦食物啊？