5:1 恁既然做上帝所疼的子，著學上帝。
5:2 也著行佇仁愛，親像基督曾疼恁，替咱獻家己做禮物做祭祀，芳芳佇上帝的面前。
5:3 若是姦淫及一切的污穢，抑是貪心，佇恁中間連講起也呣通，才是照聖徒所合宜的。
5:4 見誚事及浮漂的話，抑是戲囂的話也是不該；卡好著講感謝的話。
5:5 因為恁確實知，見若淫亂的，抑是污穢的，抑是貪心，就是拜偶像的，攏得通承接家業佇基督及上帝的國。
5:6 恁莫得互人用無影話所欺騙；因為上帝的受氣為著諸個事到佇悖逆的人。
5:7 所以，恁莫得及有份。
5:8 因為恁前是暗，若是今佇主是光，著照光明的人來行。
5:9 因為光的結子在佇一切的好及義及真。
5:10 驗明甚麼是主所歡喜的。
5:11 莫得參插佇黑暗無效果的行做，卡好著責備；
5:12 因為佇暗靜所行的，連講都見誚。
5:13 獨獨凡事受責備的，就是互光所顯明，因為見若受顯明的攏是光。
5:14 所以講：睏的人著醒，對死人中起來！就基督的光欲照你。
5:15 所以著斟酌看恁的所行是怎樣，呣通親像無智識的，著親像有智識的。
5:16 著保惜機會，因為當今的時勢邪惡。
5:17 所以呣通戇戇，著明白甚麼是主的旨意。
5:18 也莫得酒醉，會致到放肆；是著互聖神充滿。
5:19 用詩、用歌、用神的賦，大家相應答，用心吟詩作樂來謳咾主。
5:20 萬事常常佇咱的主耶穌基督的名來感謝父上帝。
5:21 著敬畏基督來相順服。
5:22 做婦仁人的，著順服家己的丈夫，親像順服主一樣。
5:23 因為丈夫做婦仁人的頭，親像基督做教會的頭；也家己做全體的救主。
5:24 總是教會順服基督，婦仁人凡事也著按呢順服丈夫。
5:25 做丈夫的，恁著疼婦仁人，親像基督疼教會。
5:26 也替伊獻家己，欲互伊成聖，是用水的洗及道理來清氣伊，
5:27 欲將伊獻互家己，做榮光的教會，無點、無皺面彼款攏無，就是聖無瑕疵。
5:28 按呢丈夫著疼伊的婦仁人，親像家己的身體；疼家己的婦仁人就是疼家己。
5:29 因為未曾有人怨恨家己的身軀，就是養飼伊保惜伊，親像基督的款待教會，
5:30 因為咱就是伊身軀的百體。
5:31 因為按呢，人欲離開父母，結聯伊的某，二個欲成做一體。
5:32 此個奧妙大啊，我講伊來指基督及教會。
5:33 總是，恁人人隨個著疼伊的婦仁人，親像家己。也婦仁人著敬畏伊的丈夫。